我知道我咁樣講絕對會即刻撻著某部分人，
但我哋呢個series係叫做MAN Talk，就係同你講出一啲最裸露最多人願意接受嘅真相；
咁所以如果你真心想離開呢條討厭嘅貧窮線，
唔想成日喺度低聲下氣嗌你嘅公會去五年後幫你爭取多0.3%嘅最低工資嘅話，
我諗以下分享畀你嘅價值會幫到你。
首先第一個最赤裸嘅現實就喺：
你現時嘅收入有幾多，喺反映你現時有幾大嘅能力。
你搵到幾多錢，就係代表你喺市場上有幾高價值；
因為喺呢個資本主義嘅社會，世界係會獎勵一啲提供value嘅人，
而唔係獎勵一啲覺得自己天生就deserve財富嘅人，咁所以唔該你唔好再咁自欺欺人。
另一樣嘢就係：
你有大學學位，碩士學位甚至博士學位，又或者考咗一系列嘅cert攞曬A都好，其實都唔代表你值得被人well paid。
你嘅沙紙，只係代表你唔係一個完全廢人，只係代表你有曾經努力過去考試。
但係你唔好覺得讀書叻就好巴閉，就覺得以後可以坐喺度等收錢；
因為你一日都唔去睇現實世界行動為其他人製造成果創造價值嘅話，你一日都唔會收到錢。
第三樣嘢就係：就算你依家有份工，你千祈唔好因為覺得自己係公司做咗十幾廿年，你嘅財政狀態就好安全。
因為世界上係冇一份真正嘅筍工，
如果你喺你嘅崗位上面變得自滿或者你嘅技能變得生疏做唔到嘢嘅話，就算你係CEO你都一樣可以隨時被人秒殺。
所以如果你拒絕去無止境地改善自己嘅話，你就可以準備好隨時被炒，
或者同你老闆一齊被公司裁員，又或者將來因為機械人嘅出現而取代你再唔值錢嘅技術。
講咗咁耐，如果你真係願意停止投訴並且為自己財政負責任嘅話，有冇啲咩投資項目係可以快啲令自己賺大錢呢？
Well，如果你依家月入係低過十萬嘅話，
其實最好嘅投資，就係將你儲落嘅錢投資喺自己身上，去提升自己嘅技能，從而增加創造力生產力同競爭力！
無論係巴菲特，定係比爾蓋茨，定係李嘉誠，
佢哋都講過話大部分人最應該率先投資嘅，就係投資喺自己身上。
如果你依家癡肥或者覺得自己冇動力冇精神嘅話，
第一樣你要投資嘅就係搞返好你嘅健康同埋荷爾蒙水平先，因為你嘅身體就係你運作嘅工具，冇強健嘅身體你咩錢都搵唔到。
第二步，當你身體已經夠強壯，
下一步就係投資喺你現時工作最需要嘅技能上面，提升你嗰一方面技能嘅熟練程度。
譬如話，如果你係賣保險嘅話，你就要學習更多銷售嘅心態或技巧，去得到更多生意。
又或者如果你做生意嘅話，你就要學識點樣建立你嘅個人形象，更加有效率地推廣你嘅產品或者服務。
如果你係做私人教練嘅話，你就要學識點樣盡快更有效率地幫你嘅clients得到佢想要嘅身材，
又或者學習一系列嘅心理技巧，成為佢最可靠嘅私人教練。
當然不同嘅技能喺各行各業都會有重疊嘅位置，
重點係你去增強自己嘅skillsets，令到你更有效率地幫到其他人解決佢哋嘅問題，你就會自自然然增加你嘅收入。 講到底，無論喺搵錢做生意定係打工，
搵錢嘅秘密：就係講緊你有冇能力協助其他人解決纏擾佢哋嘅困難，以換取金錢嘅報酬；
而下一個層次，
就係你可以點樣以槓桿原理擴大你嘅影響力，幾何級地幫到更多嘅人解決問題。
所以各位巴打，如果你現時月入低過十萬，
但係你又唔願意每個月投資一兩百蚊去購買可能幫得到你嘅書或者課程嘅話，你又點會成功呢？
最理想地，
你每個月係需要投資自己收入嘅10-20%喺你嘅個人進修上面。
我間唔中都會喺MTFU Daily Newsletter裡面同讀者分享我最近學過啲咩嘅，
咁所以如果你有興趣嘅話，你就去www.manthefvckup.com 訂閱我哋MTFU Daily嘅免費通訊啦，
我所寫嘅價值好可能某一日會啟發到你點樣搵更多錢！
