好多人都鍾意覺得自己係一個『和平理性非暴力』嘅人，覺得自己係一個講道理唔野蠻嘅人； 而大部分現代人都係習慣性地覺得『暴力就係負面嘅行為』，但係就理解唔到其實暴力都分兩種：公平正義嘅暴力，同埋不公義嘅暴力。 唔知道各位巴打成長嘅時候，有冇聽過某啲好正直嘅人同你講話：『暴力係解決唔到任何問題／暴力係唔能夠令到你搵到答案』等等聽落非常之崇高嘅觀念呢？ 但係我今日同你講：其實暴力一直都潛伏喺我哋左右，而我哋每一個人都係依靠緊暴力去維持日常生活嘅運作。 點解呢？
原因就係：無論係左翼右翼定係任何嘅政府或國家，任何一個有秩序有法治嘅社會裏面，背後係需要暴力去維持呢種嘅社會穩定性同安全感。 如果某一條法律背後係冇『暴力嘅威脅』，缺乏一種實質嘅『行動後果』嘅話，所謂嘅法律其實都係鳩噏，冇人會真係care呢條法律講咩。 譬如話：如果喺一個國家裏面偷嘢搶掠強姦係犯法嘅，但係原來所謂犯咗法之後，你係絕對唔會被人以『暴力』對待，你身體上係唔會被強迫遭受監禁嘅懲罰嘅話，你又覺得呢條法律幾有效呢？ 又或者調返轉諗，當你喺度反對『飲醉酒揸車撞死人』嘅時候，當你要求某個政府要立法強制性唔准人哋醉駕嘅時候，其實你又係唔係用緊『武力』將自己嘅意願強加於某啲人身上呢？ 再講得深入啲，當某啲環保團體聯署要求唔同嘅國家去『保護瀕臨嘅野生動物，要嚴懲一啲非法捕獵嘅獵人，並且要求某啲國家派出軍隊去通緝呢啲非法獵人嘅時候』，其實環保人士又係唔係某程度上『以暴易暴』緊呢？
重點係巴打：如果現實之中冇實質行動嘅話，一切嘅說話都係空談嘅垃圾。同樣道理，如果冇物質上身體上嘅暴力威脅嘅話，所有嘅法律其實都只係自high嘅條文。 我唔係講緊話暴力係唯一嘅答案，我更加唔係講緊話暴力係最佳解決問題嘅方法； 我只係講緊，當邏輯道理解決唔到問題，當道德良知同理心唔能夠解決問題，當好nice地講和解決唔到問題， 當你用把口批評或者恐嚇人哋時解決唔到問題，當用錢解決唔到問題時... 無論你鍾唔鍾意聽都好，暴力就係最後關頭時，解決問題嘅唯一答案。 我絕對明白喺過去七十年尚算和平嘅社會之中，會令到好多人都忘記咗暴力嘅現實： 並且將行駛暴力嘅『權力或責任』雙手供奉畀制度裏面嘅維穩部隊，將自己嘅安危outsource出去畀紀律部隊，預期警務人員會幫我哋去阻止暴力發生。 但係極少人曾經花過時間去諗，其實我哋所做嘅嘢：就係畀保護費一班攞正牌行使暴力嘅人員，去幫我哋透過暴力『阻止人哋對我哋進行暴力』。 當你同維穩部隊都覺得第三方係威脅到現時嘅秩序嘅話，你就會覺得維穩部隊所做嘅暴力行為係合法合理。 問題係：無論你身處邊個國家，你係咪真係咁信任當地政府會伸張正義呢？ 你係咪真係咁信任收咗你保護費嘅牧羊犬，會幫你班羊群『以暴易暴』對付豺狼呢？ 當豺狼用暴力對待你嘅時候，甚至可能當牧羊犬變節嘅時候，喺嗰一個當下時刻，你呢隻手無寸鐵嘅白羊，係咪真係諗住去等正義超人去護你，定係你會有能力保護自己呢？
咁所以各位請記住：就係正正因為你害怕自己將來會被暴力對待，
你更加應該唔好再做一隻任人宰割嘅羔羊，而應該鍛鍊自己成為一個有能力進入暴力狀態嘅牧羊犬！ 暴力係永遠都唔會消失，
既然你知道每時每刻你都有機會受豺狼威脅嘅話，你更加應該放自己係一啲有暴力成分嘅受控環境之中，讓自己習慣面對暴力嘅真相。 我唔係叫你要變成一個暴戾嘅人，更加唔係叫你要濫用暴力去剝削其他羊群； 但你絕對要知道，世界和平係有代價嘅，因為暴力就係人類基因嘅一部分。 希望各位唔好再奉旨其他人會合情合理地保護你生命財產， 因為某一日如果你可能得罪咗我嘅話，我可能都會用呢把九吋長嘅餐刀去暴力對待你，祝你一路出入平安。
